అర్జెంట్ గా గొప్పవాళ్ళు కావటం ఎలా ?

ఈ మధ్య నేను కొంచెం లో ప్రొఫైల్ మైంటైన్ చేస్తునట్లు గా నాకు అనుమానం గా ఉంది . సో...ఇప్పుడు నాకున్న ఏకైక ద్యేయం రాత్రికి రాత్రికి గొప్ప దాన్ని కావటం . ఇలా కావటానికి నాలో మిడి మిడి జ్ఙానాన్ని తట్టిలేపి కొన్ని ఐడియాలని పట్టేసా . అసలే ఇది ఓపెన్ సోర్సు యుగం కదా నా ఐడియాలని నాకోక్కదానికే స్వంతం అని నా బుర్రలో పెట్టి తాళం వేయటం ఎందుకు అని ఇదుగో ఇలా పబ్లిక్ గా బ్లాగులో పెడుతున్నా . మీకు నచ్చితే విచ్చలవిడి గా వాడేసుకోండి, చూసారా నేను ఎంత నిస్వార్ధపరురాలినో .

ఆ ఐడియాలని ఫాలో అయ్యేముందు మీరు ఈ చిన్న పనులు చేయాలి అవి :

ముందు గా ఈ సంవత్సరం జాతకఫలాలు లో మీ రాశి ఫలితాలు   చూసుకోండి రాజపూజ్యం 5 , అవమానం 1 ఉందనుకోండి హాపీస్ ఇక మన పోబ్లెం సగం solved లేదనుకోండి ఏముంది సింపుల్ మీకు ఈ రాశి నచ్చితే అది మీది అయ్యేట్లు మీ జన్మ రహస్యపు వివరాల డేటాని మార్చేయ్యటమే.

బాగా గుళ్ళు వున్న ఏరియా చూసుకొని సైకిల్ వేసుకొని ప్రతి గుడిలో ప్రసాదం తినడం ప్రాక్టీస్ చేయండి , స్టీవ్ జాబ్స్ అమెరికా లో ఇస్కాన్ టెంపుల్ లో పెట్టె ఫ్రీ భోజనం ఒక సంవత్సరం పాటు తిన్నాడట ఇక మనమెంత. దానితో మనం యాపిల్ లాంటి సంస్థను కాకపోయినా జామపండు లేదా కనీసం అరటిపండు కంపనీ పెట్టుకోవచ్చు. 

ఒక మంచి నక్కని తెచ్చి మీ వాకిట్లో దాని తోక మీరు నడిచే దారిలోకి వచ్చేట్లు గా కట్టేయండి, వీలయితే ఏ ఫెవికాల్ నో వాడి మీరు నడిచే దార్లో అతికించేయండి . ఏంటండీ అలా అయోమయం గా చూస్తారు మీరెప్పుడు వినలా "వీడు నక్క తోక తొక్కి వచ్చాడు" అనే ముక్క ? (మరీ ఇంత అయోమయం ఐతే కష్టం అండీ ) ఇంతకీ ఆ నక్కని కట్టేసాక మీరు చేయాల్సిన పని జస్ట్ మీరు బయటికి వెళ్ళేప్పుడల్లా దాని తోక తోక్కడమే . మీ కర్మ కాలి అది కరిచిందనుకోండి మీరెళ్ళి బూరెల బుట్టలో పడ్డట్లే ఏ టీవీ 10 లేదా 11 వాడో వచ్చి మీరు నక్కని తెచ్చి పెంచటానికి గల కారణాలు తవ్వి తీసి ఒకరెండు రోజులు పండగ చేసుకుంటాడు ఇక మీరు ఫుల్ famous

సరే ఇక మనం మన జీవితాన్ని మార్చే ఐడియాల్లోకి వచ్చేద్దాం :

1.కొత్తగా ప్రారంభమయ్యే తెలుగు టి.వి సీరియళ్ళ లో ఏదో ఒక వేషం సంపాదించండి . హీనపక్షం ఐదు నుంచి పదేళ్ళ వరకు  పొద్దునో , సాయంత్రమో , రాత్రో ఏదో ఒక సమయంలో మీ దర్శన భాగ్యం అఖిల్లాంద్ర ప్రేక్షకులకి ఉచితం. అంతే కాకుండా ఏ దిక్కుమాలిన రియాల్టీ షో కో మిమ్మల్ని ఒక సెలబ్రిటీ గా మిమ్మల్ని పిలుస్తారు కాబట్టి అదో అడినల్ అవకాశం. కాకపొతే మీ టాలెంట్ అంతా వాడి ఎంత జనాలని ఎంత హింస పెట్టాలంటే హిట్లర్  వంటి వాళ్ళు మీ ముందు ఎంత అనుకోవాలి , అప్పుడే మీ పేరు పది కాలాల పాటు నిలుస్తుంది .

2. మీరు సాఫ్టువేరు కార్మికులా అయితే ఎర్ర పార్టీలు ఎలాగు మిమ్మల్ని పట్టించుకోవు. మీరే అన్ని పార్టి ల రంగు కలిపి ఒక  జెండా తయారు చేసి - పార్టీ పెట్టి అందరిని ఏకం చేసి ఒకే చోట వుండడానికి కావలసినంత భూమిని కబ్జా చేయండి , అంటే అక్కడ మీ జెండాను పాతండి. దెబ్బకి మీపేరు తో ఒక కాలనీ వెలుస్తుంది , అదృష్టం ఉంటే విగ్రహాలు ఆ పై తెలివి తేటలతో ఓటు బ్యాంకు రాజకీయాలు చేయొచ్చు .

  

3.. మీ తాత గారు బాగా కథలు చెబుతారా ? అయితే మీ అదృష్టం బావుంది , ఆయన దగ్గరకి పోయి కాకపట్టి  పురాణాలలో పిట్ట కథలు చెప్పించుకొని, అరిషడ్ వర్గాలను జయించి (నిజం గా కాదు అలా ఆక్షన్ చేయటం నేర్చుకొని) ఒక బాబా గా అవతారం దాల్చండి ఒక దెబ్బకి రెండు పిట్టలు డబ్బుకు డబ్బుకు , పేరు కు పేరు .

4 . ఏదో ఒక వర్గం అన్యాయం అవుతున్నారు అని ఒక agitation మొదలు పెట్టండి , మొత్తం ఒక వర్గం వారి సింపతీ మీ సొంతం ఇక మీడియా లో మీ పేరు మారుమోగి పోవటం కాయటం .

5.ఎక్కడి ఎక్కడి పురాతన సంపదని ఈ రకం గా అభివృద్దికి వాడొచ్చో మీ అమూల్యమైన సలహాలు ఉచితయం గా ఇచ్చేయండి . మీరు గొప్ప దయార్ద్ర హృదయులు అన్న ముద్ర సంపాదించుకోవచ్చు .

6 . డమ్మీస్ ఫర్ చేతబడి , చేతబడి ఇన్ nutshell అని బుక్ రాసి online లో అమ్మకానికి పెట్టండి .


ఏంటి ఇవన్ని వద్దు జనాలకి ఉపయోగపడేవి సలహాలు కావాలా ? ఏంటి మీరే కాలం లో ఉన్నారు అలాంటి చేసి పేరు సంపాయించటం అయ్యే పనేనా ? మీ పిచ్చ కాకపొతే ! సరే మీ ఉత్సాహాన్ని నేనెందుకు చల్లార్చాలి , కాస్కోండి :

   

1 . ఎక్కడ పడితే అక్కడ సెల్ ఫోనులో వేసే సొల్లు ఆపే ఒక వెంటతీసుకొని వెళ్ళగలిగే జామర్ ని కనిపెట్టి వెర్బల్ డయేరియా ని అరికట్టి నాలాంటి వాళ్ళ ఆరోగ్యాన్ని కాపాడిన వారవుతారు .

2 . SMS లు చూసి , లేదా ఎవరో చెప్పే మాస్ హిస్త్రీరియా తో ఊగిపోయి కనపడిదనడల్లా ద్వసం చేసే జనాలకి రెండు చెవులు మధ్య పదార్ధం ఉంది దానితో ఆలోచించాలి అని హెచ్చరించే ఒక చిప్ ని కనిపెట్టండి .

3 . రోడ్ల మీద ఎక్కడ పడితే ఊసే పవిత్రమైన అలవాటు ఉన్నవాళ్ళని ఆ పని చేయాలి అనుకోగానే నోరు తెరుచుకోకుండా చేయగలిగే యంత్రాన్ని కనిపెట్టండి .

  

4 . నేను మాత్రం బిజీ మిగలిన జనాలకి పనిపాటా లేదు అన్నట్లు signal jumpings లేదా అడ్డదిడ్డం గా డ్రైవింగ్ చేసేవాళ్ళని , అలాగే హాస్పిటల్స్ వంటి పబ్లిక్ ప్లేసెస్ లో నానా హడావిడి చేసేవాళ్ళని సరైన దారిలో పెట్టె యంత్రాన్ని కనిపెట్టండి .

ఏంటోనండి జనానికి పనికొచ్చే  విషయాలు  చెబుతున్నా, కానీ  ఈ ఐడియాలతో  టైం వేస్ట్ తప్ప పని జరగదు అని గట్ ఫీలింగ్,  ఉదాహరణకి ఒక సారి మీ చూట్టూ ఉన్న వాళ్లకి ఈ  చిన్న ప్రశ్నలు  వేసి చూడండి "పెన్సిలిన్ ని కనిపెట్టినది   ఎవరు "  ? అలాగే  "లేటెస్ట్  బద్రినాథ్  సినిమా లో    హీరో       ఎవరు" ?  ఆ రెండిటికి వచ్చిన సరైన సమాధానాల percentage  తో నిర్ణయించుకోండి  ఏది సులువైన దారో :)   

ప్రస్తుతానికి నాకు తోస్తున్నవి ఇవండీ , మీకు తట్టిన అమూల్యమైన సలహాలని కామెంట్ల రూపం లో నలుగురికి పంచటం మర్చిపోకండే